Чацвер - дзень роднай мовы

АДЗІНЫ ДЗЕНЬ БЕЛАРУСКАГА МАЎЛЕННЯ

 “Не пакідайце ж мовы нашай беларускай, каб не ўмёрлі” – пісаў яшчэ ў ХІХ стагоддзі класік беларускай літаратуры Францішак Багушэвіч. На жаль, актуальным гэты заклік застаецца і для нас, беларусаў ХХІ стагоддзя.

Таму ў 2016-2017 навучальным годзе кожны чацвер будзе адзіным днём беларускага маўлення. У гэты дзень у нашай школе будуць праводзіцца разнастайныя гульні, конкурсы і віктарыны, накіраваныя на папулярызацыю беларускай мовы.

 

Я прапаную вам прачытаць

12 сакавіка ў нашай дзяржаўнай установе для вучняў 5 класаў прайшоў конкурс-прэзентацыя “Я прапаную вам прачытаць”. Якую кнігу выбраць у бібліятэцы? Прачытаць фантастычнае апавяданне або пра вандроўнікаў, гістарычную аповесць ці пра жывёл, чароўную казку або бытавую – уся гэтая жанравая разнастайнасць пільна разглядалася юнымі чытачамі. Пяцікласнікі вялі гутарку пра творы мастацкай літаратуры, якія ім найбольш спадабаліся і прапанавалі сваім сябрам іх прачытаць.

Вучні 8 класаў падрыхтавалі пытанні для віктарыны “Мой слоўнік”. Пытанні былі вельмі розныя. Вучням трэба было ўспомніць з чаго складаецца вопрытка сучаснага беларуса, назваць прыстасаванні працы і посуд, вызначыць стравы нацыянальнай кухні.

Настаўнік беларускай мовы і літаратуры Прасаловіч Н.Л.

Будучае за маладым пакаленнем

27 лютага адзіны дзень беларускага маўлення запрасіў вуняў дзясятага класа да спаборніцтва: яны сталі ўдзельнікамі конкурсу сачыненняў-мініяцюр “Адзіны дзень беларускага маўлення”. Дзесяцікласнікі падзяліліся сваімі меркаваннямі наконт прычыны заняпаду роднай мовы, выказалі абурэнне тым, што ў нашай краіне, на вялікі жаль, роднае слова гучыць толькі ў навучальных установах і па некаторых каналах тэлебачання. Але яны ўпэўнены, што ў нас ёсць выйсце і не ўсё так дрэнна, таму што пачалі з’яўляцца людзі, якія не саромеюцца гаварыць на роднай мове, а нават лічаць гэта будзённым і звычайным, бо мова гэта наша. Будучыня менавіта за маладым пакаленнем.

Настаўнік беларускай мовы і літаратуры Прасаловіч Н.Л.